प्रातः स्मरामि शरदिन्दुकरोज्ज्वलाभाम्
सद्रत्नवत् सकलकुण्डलहारशोभाम् ।
दिव्यायुधोर्जितसुनीलसहस्रहस्ताम्
रक्तोत्पलाभचरणां भवतीं परेशाम् ॥१॥

प्रातर्नमामि महिषासुरचण्डमुण्ड-
शुम्भासुरप्रमुखदैत्यविनाशदक्षाम् ।
ब्रह्मेन्द्ररुद्रमुनिमोहनशीललीलाम्
चण्डीं समस्तसुरमूर्तिमनेकरूपाम् ॥२॥

प्रातर्भजामि भजतामभिलाषदात्रीम्
धात्रीं समस्तजगतां दुरितापहन्त्रीम् ।
संसारबन्धनविमोचनहेतुभूताम्
मायां परां समधिगम्य परस्य विष्णोः ॥३॥

श्लोकत्रयमिदं देव्याश्चण्डिकायाः पठेन्नरः ।
सर्वान् लोकानवाप्नोति विष्णुलोके महीयते ॥